September 23, 2018 at 05:02PM

Wänn's i de Gasse tunklet

Wänn's i de Gasse tunklet
Und schtill wird nadisna,
Wänn d'Liechtli lys verlösched
An all-ne Feischter na,
Dänn chömeds deet vom Wäldli,
Weisch ob em Chile-Rai -
Di chline muntre Mändli,
und flismed allerlei.

Si schlörpeled und gümpeled
Gönd z'ringelum um's Huus
Und lueged nach de Chinde,
Und schpienzled alles uus:
Si ghööreds, wenn es Chindli
na öppis zwänge wott;
Dä macheds feschti Füschtli
Und rüefed: Tuusigs Chrott!

Und gseends gar Chinde-Gwändli
Im Schtübli ganz verschtreut -
Nid uufgrumt und kei Ornig -
Chasch dänke, wie's das freut!
Dä zabbleds aber gleitig
Dervoo in tunkle Wald
Zum Chlaus is Felsehüüsli,
De weiss dänn alles bald.

Was er seit, liebi Chinde
Und- Wies dänn use chunt
Das merked er dänn öppe,
S'gaat nume mengi Schtund.

(Für di Chline, Züridütschi Chlausversli, Wienachtsliedli ... von Mina Stünzi, Verlag: Fritz Frei, Horgen Zürich)