July 17, 2018 at 03:35PM

Im Dörfli zündets d'Latärne-n-a

Im Dörfli zündets d'Latärne-n-a
Und s'gyret und chnischteret em Waldweg na.
Was chunnt ächt do z'faare? I luege-n-uus;
De Schnee schtüübt um d'Tanne, es isch en Gruus,
doch mag is erluege - jetz mag is gsee,
En Schlitte faart über de gfroore Schnee,
Äs Eseli ziät-en, de Chlaus gaat voruus
Blast em ächt de Wind d'Laterne nid uus?
O wänn-er doch nu au de Weg rächt weiss!
- Das gyret und pfyft i dem Schlittegleis -
Jetz cheert-er es bitzli, grad nimmt-er de Rank
Gäg euserem Dörfli, - Gott Lob und Dank!
O Chlaus, gäll lersch-mer de Schlitte nid uus,
Faar ämel dä zerscht vor eusers Hus! -

(Für di Chline, Züridütschi Chlausversli, Wienachtsliedli ... von Mina Stünzi, Verlag: Fritz Frei, Horgen Zürich)